ЭРХЭМ ХАРИЛЦАГЧ ТАНД ШИНЭ 7 ХОНОГИЙН МЭНД ХҮРГЭЕ!

Хөрөнгө оруулалтын оновчтой шийдвэр гаргалтад тань туслах үнэн бодит мэдээлэл, судалгаа шинжилгээнд суурилсан “Тоймлоё - Эдийн засаг, зах зээл, боломжууд” товхимлыг хүргүүлж байна.

ӨНГӨРСӨН 7 ХОНОГИЙН ОНЦЛОХ МЭДЭЭ

• Энэ оны эхний таван сард үнэт цаасны зах зээлийн гүйлгээ 797.5 тэрбум төгрөгт хүрч, анхдагч зах зээлийн идэвхжил нэмэгдсэнээр өмнөх оны мөн үеэс 465.1 тэрбум төгрөгөөр буюу 2.4 дахин өссөн байна.

• SpaceX-ийн IPO‑ийн дараах эхний долоо хоногт хувьцааны ханш 37%-иар өсөж үнэлгээ нь 2.4 их наяд ам.долларт хүрлээ.

• Nvidia 25 тэрбум ам.долларын бондыг зах зээлд амжилттай гаргалаа.

• "Монголын хөрөнгийн бирж" ХК-ийн удирдлага Люксембургт айлчилж, хөрөнгийн зах зээлийн хөгжил болон олон улсын хамтын ажиллагааг өргөжүүлэх чиглэлээр санал солилцлоо.

• Энэ оны эхний улиралд бодит цалингийн индекс 4.5%-иар өссөн ч хөдөлмөр эрхлэлтийн тоо буурсан үзүүлэлттэй байна.

• Монголбанкны дэд ерөнхийлөгч ЕСБХБ-ны жилийн уулзалтад оролцож, олон улсын санхүүгийн байгууллагуудтай хамтын ажиллагааг өргөжүүлэх чиглэлээр чухал хэлэлцээ хийлээ.

• Энэ оны эхний таван сард аж үйлдвэрийн салбарын нийт үйлдвэрлэл 28.2 их наяд төгрөгт хүрч, уул уурхайн салбарын огцом өсөлтөөр өмнөх оны мөн үеэс 50.1%-иар нэмэгдлээ.

✨ ХӨРӨНГӨ ОРУУЛАЛТЫН БОЛОМЖУУД

🏆 Үнэт цаасны давуу тал: 

✅  Хөрөнгөө найдвартай өсгөх боломж

✅  Хөрвөх чадвар өндөр – Богино хугацаанд эзэмших боломжтой

✅  Хүүгийн төлөлт тогтмол – Та хүлээн авсан хүүгийн орлогоо дахин хөрөнгө оруулалт хийх замаар өгөөжийн түвшнийг нэмэгдүүлэх боломжтой.

✅  Хадгаламжийн хүүтэй харьцуулахад жилийн дунджаар 7 нэгж хувиар өндөр өгөөж

✅  Барьцаа, баталгаатай

✅  Мэргэжлийн зохицуулах байгууллагуудын хатуу, хяналт шалгалтын дараа хөрөнгө оруулагчдад санал болгож буй бүтээгдэхүүн

👉Та доорх холбоос дээр дарж мэдээллээ оруулснаар манай хөрөнгө оруулалтын мэргэшсэн зөвлөхүүд тань руу холбогдож үнэт цаасны дэлгэрэнгүй мэдээлэл болон арилжаанд оролцох заавар хүргэх болно.

📞 Холбоо барих: 7010-0261, 8008-8704, 8072-2433, 8000-3148

ДОТООД ЗАХ ЗЭЭЛИЙН ТОЙМ

МУ-ЫН ХӨРӨНГИЙН ЗАХ ЗЭЭЛД ӨНГӨРСӨН 7 ХОНОГТ ЯМАР ӨӨРЧЛӨЛТҮҮД ГАРСАН БЭ?

• Монгол Улсын хувьцааны зах зээлийг төлөөлөх ТОП-20 индекс өнгөрөгч 7 хоногт өсөлттэй байлаа. Тодруулбал, Монголын хөрөнгийн биржийн ТОП-20 индекс 51,371.42 нэгжид хүрч 0.17 хувийн өсөлттэй хаагдлаа. 

• Мөн өнгөрсөн долоо хоногийн хугацаанд МХБ нийт 9,923 хэлцэл гүйцэтгэсэн ба хөрөнгийн зах зээлийн нийт үнэлгээ 13,456.65 тэрбум төгрөг болжээ.

• "Крипто Үндэстэн" ХК-ийн хувьцааны үнэ долоо хоногийн 17.92 хувиар өсөж, өнгөрсөн долоо хоногийн хамгийн их өсөлттэй хувьцаагаар тодров. Харин "Дархан гурил тэжээл" ХК-ийн ханш -15.00 хувиар унаж, өнгөрсөн долоо хоногийн хамгийн их уналттай хувьцаа боллоо.

МУ-ЫН ЭДИЙН ЗАСГИЙН ХУВЬД ӨНГӨРСӨН 7 ХОНОГТ БОЛСОН ОНЦЛОХ ҮЙЛ ЯВДЛЫН ТОЙМ

ОЛОН УЛСЫН ЗАХ ЗЭЭЛИЙН ТОЙМ 🌍

Өнгөрсөн долоо хоногт АНУ‑ын хөрөнгийн зах зээл өсөлттэй хаагдаж, Nasdaq индекс 2.43%-иар, S&P 500 0.93%-иар, Russell 2000 1.21%-иар тус тус нэмэгдлээ. Зах зээлийн өсөлтөд АНУ–Ираны хоорондын тохиролцоо нөлөөлж, Ормузын хоолой нээгдэх хүлээлт бий болсноор газрын тосны үнэ буурсан нь эерэг нөлөө үзүүллээ.

ХНС бодлогын хүүгээ 3.50–3.75% түвшинд хэвээр хадгалсан ч цаашид хүү өсөх магадлалыг илэрхийлсэн нь зах зээлд болгоомжлол үүсгэв. Инфляцын төсөөлөл нэмэгдэж, бодлогын чиг хандлага чангарч болзошгүй гэсэн дохио гарснаар богино хугацааны бондын өгөөж өссөн байна.

Эдийн засгийн үзүүлэлтүүдээс жижиглэн худалдаа 0.9%-иар өссөн нь хэрэглээ тогтвортой байгааг харуулсан бол орон сууцны зах зээлд сулрал үргэлжилж байгааг эдийн засагчид онцоллоо. Ийнхүү геополитикийн эерэг дохио зах зээлийг дэмжсэн ч инфляц болон мөнгөний бодлогын тодорхойгүй байдал ойрын хугацаанд гол эрсдэл хэвээр байна.

​Өнгөрсөн долоо хоногт Европын хөрөнгийн зах зээл өсөлттэй хаагдаж, STOXX Europe 600 индекс 0.62%-иар нэмэгдлээ. АНУ–Ираны тохиролцооны мэдээ хөрөнгийн зах зээлд эерэг нөлөө үзүүлсэн ч макро эдийн засгийн үзүүлэлтүүд холимог хэвээр байна. 

Евро бүсийн гадаад худалдаа дөрөвдүгээр сард 1 тэрбум еврогийн алдагдалтай гарч, эрчим хүчний импортын зардал өслөө. Германд бөөний үнийн өсөлт 5.9% болж саарсан ч түүхий эд, нефтийн бүтээгдэхүүний үнэ өндөр хэвээр байна. Харин бизнесийн итгэлийн индекс сайжирч, эдийн засгийн хүлээлт тодорхой хэмжээнд эергээр өөрчлөгдөв.

Мөнгөний бодлогын хувьд Английн төв банк бодлогын хүүг 3.75% түвшинд хэвээр хадгалж, инфляцын төлөв тодорхойгүй хэвээр байгааг онцолсон байна. Ийнхүү геополитикийн эерэг дохио зах зээлийг дэмжсэн ч гадаад худалдааны алдагдал, инфляцын дарамт болон бодлогын тодорхойгүй байдал Европын зах зээлийн төлөвийг болгоомжтой хэвээр хадгалж байна.

Өнгөрсөн долоо хоногт Японы хөрөнгийн зах зээл хүчтэй өсөлт үзүүлж, Nikkei 225 индекс 7.62%-иар, TOPIX индекс 4.80%-иар нэмэгдэж, шинэ дээд түвшинд хүрлээ. Өсөлтийг хиймэл оюун ухаантай холбоотой хөрөнгө оруулалтын өсөлтөөр дэмжигдсэн технологи, хагас дамжуулагчийн хувьцаанууд тэргүүлэв.

Геополитикийн хувьд АНУ–Ираны тохиролцоо хийгдсэн нь Ормузын хоолойн тээвэр сэргэх хүлээлтийг нэмэгдүүлж, бүс нутгийн эдийн засгийн эрсдэлийг бууруулсан эерэг нөлөө үзүүллээ. Японы Төв банк бодлогын хүүг 1% хүртэл нэмэгдүүлж, 1995 оноос хойших хамгийн өндөр түвшинд хүргэв. Энэхүү шийдвэр нь инфляцын дарамт болон иений сулралтай тэмцэх зорилготой бөгөөд мөн бонд худалдан авалтаа бууруулах бодлогоо үргэлжлүүлж байгаа юм.

Макро үзүүлэлтүүд харьцангуй эерэг гарч, экспорт 17%-иар өссөн нь технологи болон автомашины экспортын өсөлттэй холбоотой байв. Мөн үндсэн тоног төхөөрөмжийн захиалга 8.7%-иар өссөн нь бизнесийн хөрөнгө оруулалт сэргэж байгааг илтгэж буйг шинжээчид онцоллоо.

​Өнгөрсөн долоо хоногт Хятадын хөрөнгийн зах зээл холимог гүйцэтгэл үзүүлж, CSI 300 индекс 3.44%-иар, Shanghai Composite индекс 1.46%-иар өссөн бол Хонконгийн Hang Seng индекс 3.21%-иар буурлаа. Хөрөнгийн зах зээлд АНУ–Ираны тохиролцооны дараах газрын тосны үнийн бууралт эерэг нөлөө үзүүлсэн ч гадаад зах зээлд болгоомжлол давамгайлсан хэвээр байв.

Макро эдийн засгийн үзүүлэлтүүдээс аж үйлдвэрийн үйлдвэрлэл 4.5%-иар нэмэгдсэн нь экспорт, үйлдвэрлэлийн салбарын идэвх сайжирсныг илтгэж байгаа бол жижиглэн худалдаа 0.6%-иар буурсан нь дотоодын эрэлт сул хэвээр байгааг харуулж байна.

Үл хөдлөх хөрөнгийн салбарын сулрал үргэлжилж, хөрөнгө оруулалт 16.2%-иар буурсан ч томоохон хотуудад үнэ бага зэрэг сэргэж эхэлсэн нь бодлогын дэмжлэг тодорхой үр өгөөж өгч байгааг харууллаа. Үүний зэрэгцээ Хятадын Төв банк санхүүгийн зах зээлийг дэмжих, юаний олон улсын хэрэглээг нэмэгдүүлэх шинэ арга хэмжээг танилцуулсан нь урт хугацаанд эерэг дохио болов.

МАКРО ҮЗҮҮЛЭЛТҮҮД ТАРХАХ ХУВААРЬ | 2026.06.22 - 06.26

🔎 ОНЦЛОХ ШИНЖИЛГЭЭ

Мөнгө, зээлийн хүчтэй өсөлт: Эдийн засгийг дэмжих үү, эсвэл инфляцын дарамтыг нэмэх үү?

2026 оны 5 дугаар сарын эцсийн урьдчилсан гүйцэтгэлээр мөнгөний нийлүүлэлт (M2) 52.0 их наяд төгрөгт хүрч, өмнөх оны мөн үеэс 27.5 хувиар өссөн нь дотоодын мөнгөн урсгал нэлээд тэлснийг харуулж байна. Энэхүү өсөлтөд төгрөгийн хадгаламж 28.1 их наяд төгрөг, төгрөгийн харилцах 11.6 их наяд төгрөг, валютын харилцах 5.7 их наяд төгрөгт хүрсэн нь голлон нөлөөлсөн байна. Үүнтэй зэрэгцэн нийт зээлийн үлдэгдэл 47.6 их наяд төгрөгт хүрч, жилийн дүнгээр 17.1 хувиар өссөн нь банкны систем эдийн засгийг идэвхтэй санхүүжүүлж байгааг илтгэж байна.

Энэ дүр зураг нь нэг талаас эдийн засгийн идэвхжил, хэрэглээ, хөрөнгө оруулалтыг дэмжих эерэг дохио юм. Ялангуяа төгрөгийн хадгаламжийн 81.0 хувь нь иргэдийн хадгаламж байгаа нь өрхийн санхүүгийн хуримтлал тэлж байгааг, ипотекийн зээл 12.0 их наяд төгрөгт хүрч 19.9 хувиар өссөн нь орон сууцны санхүүжилтийн эрэлт үргэлжилж байгааг харуулж байна. Гэвч мөнгө, зээлийн ийм хурдтай өсөлт нь инфляцын дарамтыг гүнзгийрүүлэх, импортын эрэлтийг нэмэгдүүлэх, улмаар ханшид дарамт өгөх эрсдэлтэй. ҮСХ-ны 2026 оны I–V сарын үзүүлэлтээр хэрэглээний үнийн индекс 11.2 хувиар өссөн нь мөнгөний тэлэлт бодит худалдан авах чадварт бүрэн эерэгээр шингэхгүй байгааг давхар сануулж байна.

Одоогийн байдлаар зээлийн чанарын үзүүлэлт системийн эрсдэл огцом муудаагүйг харуулж байна. Хэвийн зээл нийт багцын 92.0 хувь, анхаарал хандуулах зээл 2.7 хувь, чанаргүй зээл 5.3 хувь байгаа нь өсөлт дагасан эрсдэл хяналтаас гараагүйг илтгэж байна. Гэхдээ ирэх улирлуудад орлогын өсөлт инфляцаа гүйцэж чадахгүй, хэрэглээний ба ипотекийн өрийн дарамт нэмэгдэх нөхцөл үүсвэл өрхийн санхүүгийн тэнцэл сулрах эрсдэл бий. Иймээс ойрын хугацаанд мөнгөний өсөлт, зээлийн чанар, инфляц, валютын ханш гэсэн дөрвөн үзүүлэлтийг хамтад нь ажиглах нь дотоодын эдийн засгийн төлөвийг зөв унших гол түлхүүр хэвээр байна.

🧑‍🏫 ТАНЫ МЭДЛЭГТ |  Эдийн засгийн голлох ойлголтууд

1) Мөнгөний нийлүүлэлт (M2) гэж юу вэ?

Мөнгөний нийлүүлэлт буюу M2 нь хадгаламжийн байгууллагаас гадуурх мөнгө, төгрөгийн болон валютын харилцах, хадгаламж, зарим мөнгөн хэрэгслийн нийлбэрээр тодорхойлогддог үзүүлэлт юм. Өөрөөр хэлбэл эдийн засаг дахь нийт мөнгөн урсгал, хөрвөх чадварын өргөн хүрээний хэмжүүр гэж ойлгож болно. M2 өсөх нь банкны систем дэх хадгаламж, гүйлгээ, мөнгөн эргэлт идэвхжиж байгааг илтгэдэг ч хэт хурдтай өсөлт нь инфляцын эрсдэлийг нэмэгдүүлж болно.

2) Бага мөнгө (M1) юуг илэрхийлдэг вэ?

M1 нь хадгаламжийн байгууллагаас гадуурх мөнгө болон төгрөгийн харилцах дансны үлдэгдлийн нийлбэр юм. Энэ үзүүлэлт нь өдөр тутмын гүйлгээнд хамгийн амархан ашиглагддаг, хамгийн хөрвөх чадвартай мөнгийг хэмждэг. 2026 оны 5 дугаар сарын эцэст M1 12.6 их наяд төгрөгт хүрч, жилийн дүнгээр 30.5 хувиар өссөн нь эдийн засаг дахь богино хугацааны мөнгөн эргэлт идэвхтэй байгааг харуулж байна.

3) Чанаргүй зээл гэж юу вэ?

Чанаргүй зээл гэдэг нь зээл болон хүүгийн төлбөр 91-ээс дээш хоног хэтэрсэн зээлийг хэлдэг. Энэ үзүүлэлт нь банкны салбарын эрсдэлийг хэмжих хамгийн чухал хэмжүүрүүдийн нэг бөгөөд өсөх тусам эргэн төлөлтийн асуудал, санхүүгийн тогтвортой байдлын эрсдэл нэмэгддэг. 2026 оны 5 дугаар сарын эцсийн байдлаар чанаргүй зээл нийт зээлийн 5.3 хувь-ийг эзэлж байгаа нь харьцангуй тогтвортой ч анхаарал шаардсан түвшин хэвээр байна.

4) Бодит цалин гэж юу вэ?

Бодит цалин нь нэрлэсэн цалинг хэрэглээний үнийн индексээр засварлаж, худалдан авах чадварын өөрчлөлтийг илэрхийлсэн үзүүлэлт юм. Өөрөөр хэлбэл ажилтны авч буй мөнгөн дүн өссөн ч үнэ ижил хэмжээгээр эсвэл илүү өсвөл бодит худалдан авах чадвар төдийлөн нэмэгдэхгүй. 2026 оны эхний улиралд бодит цалингийн индекс 4.5 хувиар өссөн ч хэрэглээний үнийн индекс I–V сард 11.2 хувиар өссөн нь өрхийн түвшинд инфляцын дарамт хэвээр байгааг тайлбарлаж өгнө.

⚠️ Мэдэгдэл: Энэхүү мэдээлэл нь “Ти Ди Би Секьюритис ҮЦК” ХХК-ийн нэрийн өмнөөс зөвхөн харилцагчдад мэдээлэл хүргэх зорилготой бөгөөд аливаа хөрөнгө оруулалтын зөвлөгөө, үнэт цаас худалдах, худалдан авах санал биш юм. Мэдээллийн үнэн бодит байдалд шаардлагатай хяналт хийгдсэн ч баталгаа өгөхгүй. Уг мэдээллийг ашигласнаас үүссэн аливаа хохиролд “Ти Ди Би Секьюритис ҮЦК” ХХК хариуцлага хүлээхгүй болно.